Om 'n opwarmingsroetine te skep

Kuns en kultuur

Graad 8

Skepping, interpretasie en aanbieding

Module 13

Om ‘n opwarmingsroetine te skep

DRAMA

Aktiwiteit 1:

Om ‘n roetine te skep en aan die klas te bied: die opwarming

[lu 1.5]

Dit is nou jou beurt om die res van die klas deur ‘n opwarmingsroetine te lei.

Jou opwarmingsroetine moet die volgende insluit:

Ontspanning:

• die eerste prioriteit van die akteur is ontspanning
• die akteur se liggaam en stem is sy instrumente
• spanning van enige soort beperk uitvoering
• spanning wys eerste in die stem a.g.v. vlak asemhaling
• begin met die skouers
• beweeg dan na die arms en hande
• die bolyf is die middelpunt van alle beweging, omdat dit ons asem huisves
• asemhalingsoefeninge is belangrik
• eindig hierdie afdeling met die bene, enkels en die voete

Postuur / Houding:

• die postuur moet gemaklike en ekspressiewe stemgebruik en beweging toelaat
• fokus daarop om die skouers vierkantig en die maag in te hou en algehele stembeheer te behou

Asemhaling en Stem:

• goeie asemhaling is ‘n fundamentele vereiste vir stemproduksie
• alle asemhalingsoefeninge moet ná ontspanningsoefeninge uitgevoer word
• die vereistes vir goeie stemproduksie is ontspanning, goeie postuur, genoegsame asemvoorraad, beheerde gebruik van die diafragma en tussenribspiere, ontspanne en onbeperkte mondelinge- en keelresonators, en die vorming van klanke voor in die mond om ‘n keelstem te voorkom en projeksie te bevorder
• asemhaling moet met die borskas uitgevoer word deur die ribbekas te vergroot, en met die diafragma

Aktiwiteit 2:

Om ‘n geskrewe teks en afgeronde uitvoering te skep en aan te bied, gebaseer op populêre kultuur: “popstar idols”

[lu 1.6]

Is jy gereed vir die volgende opwindende projek? Maak seker dat jy presies verstaan wat jou opvoeder wil hê jy moet doen en maak seker dat jy die konsepte aangaande hierdie aktiwiteit verstaan. Moenie bang wees om te vra as jy iets nie verstaan nie!

Maar eers moet jy die konsep Populêre Kultuur leer ken.

Populêre kultuur is enige dans, literatuur, musiek, teater, of enige kunsvorm wat deur die ‘man of vrou op straat’ in ‘n literêre, tegnologies gevorderde gemeenskap aangeneem en waardeer word.

Televisie

• Televisie op sigself is ‘n aspek van populêre kultuur.
• Dit het die uitvinding van videobandopnemers en -spelers, DVD-spelers en kameras tot gevolg.
• Baie televisieprogramme val in hierdie kategorie.
• ‘Sepies’ – daaglikse dramareekse – is maar net een van hierdie vorms; slim ontwerpte advertensies is nog een.
• In die 21ste eeu is ons bekend gestel met die ‘realiteitstelevisie’-konsep, waar akteurs vervang is deur ‘regte’ mense in ‘regte’ situasies om sodoende geld of ander reuse- pryse te wen, bv. ‘Big Brother’, ‘Survivor’, ‘The Bachelor’, ‘Coca Cola Popstars’ en ‘Idols’.

Om jou eie realiteitstelevisieprogram te vervaardig, moet jy van die volgende kennis neem:

Produksie

• die volgende is noodsaaklik vir die vervaardiging van hierdie program:

• skrywers : vir ‘n teks of draaiboek
• produksiespan : vervaardigers, regisseur, verhoogbestuurders
• kunsdepartement : stelontwerpers, stelbouers, kostuumontwerpers, grimeerkunstenaars, haarstiliste, rekwisietemeesters
• musiekdepartement : musiekregisseur, stemafrigter, musikante
• tegniese departement : videokamera-operateurs, klankingenieurs, beligtingsontwerpers en -operateurs
• bemarkingsdepartement
• deelnemers : aanbieders, sangers, beoordelaars

Jou opvoeder sal al hierdie portefeuljes aan jou verduidelik. By watter departement sal jy graag betrokke wil wees? Of sal jy graag een van die deelnemers wil wees? Jy kan kies!

Om hierdie program in werking te stel het ons ‘n teks nodig.

Die teks

• Bespreek, stel notas saam, stel raamwerk op en skryf ‘n teks vir die produksie as ‘n gesamentlike poging waar al die leerders in die klas betrokke is.
• Die teks moet die volgende insluit:

• die programverloop van die produksie, bv. wat gebeur eerste, tweede, ens., tot die laaste toneel van die program;
• dialoog vir die aanbieders;
• orde van die optredes;
• openingstoneel;
• slottoneel;
• beoordelingsafdelings na elke optrede;
• aankondiging van die wenner.

Noudat ons ‘n teks het, kan ons begin. Hier volg ‘n samestelling van die produksie om jou te help met jou beplanning. Maak ‘n merk langs elke item soos dit voltooi word. Hierdie is slegs ‘n voorbeeld. Jy kan jou eie produksielys saamstel volgens jou eie vereistes.

Produksielys

Hierdie projek is ‘n spanpoging en dit vereis dat jy baie nou met die ander leerders in jou klas moet saamwerk sodat “Popstar Idols” ‘n sukses kan wees!

Geniet dit!

Assessering