3.3 Leesaktiwiteite

Afrikaans huistaal

Graad 6

Module 8

Leesaktiwiteite

1. DIE VERMISTE JUWELEKISSIE

Mev. Natalie Haussman is ‘n stralerjakker. Sy was al drie keer getroud. Haar vorige man, mnr. Dieter Haussman, die skatryk nyweraar, het sy verlaat en vir ‘n jaar lank oorsee gaan rondrits. Sy het duur smaak, volg Paryse modes slaafs na en is versot op skuimbaddens, sjampanje en kaviaar. Haar spandabelrigheid het haar egter begin inhaal en deesdae word sy gereeld in die vermeende dwelmhandelaar, Claus von Bodenstein, se geselskap gesien. Sy huur tans die Koninginsuite in die bekende vyfster Maynardville Hotel in Kaapstad. Sy bring ook baie tyd op haar jag, Die Victoria , wat in die Kaapse seiljaghawe voor anker lê, deur. Hier onthaal sy en Claus von Bodenstein van sy berugte vriende. In die Kaapse gesiene kringe word gefluister dat sy ‘n koerier vir kokaïene is.

1. Ek is seker nadat jy bostaande gedeelte gelees het, jy verskeie “beelde” in jou geestesoog (verbeelding) gevorm het. Gebruik nou taal skeppend en beskryf vir ons (mondelings) wat jy visualiseer.
2. Visualiseer en beskryf die Koninginsuite
3. Visualiseer die seiljag Victoria
4. Visualiseer en beskryf Claus von Bodenstein

• Die aand van 25 Mei 2002 was daar, volgens mev. Haussman, ‘n inbraak in haar suite en is haar juwelekissie gesteel. Sy is, volgens haar, in haar aantrekkamer oorval en van agter met ‘n marmerbeeldjie oor die kop geslaan. Sy het nie die aanvaller gesien nie. Sy het later haar bewussyn herwin en ontvangs geskakel wat die polisie ontbied het. In haar kamer op ‘n Koning Lodewyk XIV-tafeltjie is twee glase drank gevind, asook ‘n bottel whisky. Daar is ook 500 g kokaïen in ‘n kaslaai gevind. ‘n Swart klapmus, wat mev. Haussman ontken hare is, is op die vloer aangetref.
• Wat het gebeur? Jy is die speurder. Los die diefstal op. Bestudeer die illustrasie deeglik en stel ‘n polisieverslag saam. Jou verslag sal die volgende opskrifte hê: Saaknommer; Datum van misdaad; Ondersoekbeampte; Lêernommer.

1.2 Die deurwag, mnr. Johan Schwartz, het die dag van die diefstal ‘n verdagte karakter die hotel sien binnegaan, min of meer die tyd toe die diefstal volgens mev. Haussman plaasgevind het. Kom ons veronderstel jy was die deurwag. Kies een van die skurke, knip dit uit en plak ditop ‘n vel papier. Beskryf die karakter so volledig moontlik. Gee aandag aan fynere besonderhede. Bou só ‘n identikit van die krimineel op.

1. Sersant Jordaan het ook die saak ondersoek en die volgende vrae aan mev. Haussman gestel. Beantwoord die vrae in die direkte woorde soos jy dink mev. Haussman dit beantwoord het. Beantwoord asseblief in volsinne.

1. “Hoe laat is u in u hotelkamer oorval?”
2. “Waarmee is u aangeval?”
3. “Hoe dink u het die aanvaller toegang tot u suite verkry?”
4. “Saam met wie het u ‘n drankie geniet voordat u aangeval is?”
5. “Hoekom het u ontvangs geskakel en nie die polisie nie?”
6. “Aan wie behoort die klapmus wat op die kamervloer lê?”
7. “Wat word alles saam met u juwelekissie vermis?”
8. “Is u juwele verseker en vir watter bedrag?”
9. “Wanneer het u laas met mnr. Claus von Bodenstein kontak gemaak?”
10. “Ek en my ondersoekspan het kokaïen in u suite gevind. U sal ons na die polisiekantoor moet vergesel. Wil u u regsverteenwoordiger skakel?”
11. Die antwoorde wat jy neergeskryf het, is die direkte woorde soos mev. Haussman geantwoord het. Mnr. Jordaan se vrae is ook in die direkte rede . Wanneer ons die direkte rede gebruik, is die direkte woorde wat die persoon gesê het, altyd tussen aanhalingstekens . Mev. Haussman het sersant Jordaan geantwoord: “Ek het saam met ‘n vriendin, Mieke Laubser, ‘n drankie geniet.” Die woorde tussen aanhalingstekens is dus mev. Haussman se direkte woorde . As jy bv. ook deel van die ondersoekspan was en later die inligting aan ‘n kollega moet deurgee, sal jy dalk soos volg rapporteer : Mev. Haussman het gesê dat sy saam met haar vriendin, Mieke Laubser, ‘n drankie geniet het. Hier word dus van die indirekte rede gebruik gemaak. Die aanhalingstekens word nou weggelaat.
12. Skryf nou al die antwoorde (direkte rede) van (a) tot (j) in die indirekte rede oor. Jy was deel van die ondersoekspan en vertel nou aan iemand anders wat mev. Haussman geantwoord het.
13. Daar is dus twee maniere om te skryf wat iemand anders gesê het. Kyk na die volgende voorbeelde: