2.61 Om probleme in konteks op te los

Wiskunde

Gewone breuke en desimale breuke

Desimale breuke

Opvoeders afdeling

Memorandum

INLEIDING

Daar is 5 modules:

1. Getalbegrip, Optelling en Aftrekking

2. Vermenigvuldiging en Deling

3. Breuke en Desimale Breuke

4. Meting en Tyd

5. Meetkunde; Datahantering en Waarskynlikheid

4 Dit is belangrik dat opvoeders die modules in volgorde (soos hierbo genoem) sal doen, aangesien die leerders die vorige module se kennis en vaardighede benodig vir die daaropvolgende module.

3. GEWONE EN DESIMALE BREUKE (LU 1; 2 EN 5)

LEEREENHEID 1 FOKUS OP GEWONE BREUKE

• Hierdie module is ‘n voortsetting van die werk wat in graad 5 gedoen is. Daar word uitgebrei op die optelling en aftrekking van breuke, en die berekening van ‘n breuk van ‘n sekere hoeveelheid word ook hersien.
• Maak seker dat die leerders die korrekte terminologie bemeester het, asook die korrekte strategieë om bogenoemde korrek te bereken.
• Kritieke Uitkoms 5 (Effektiewe kommunikasie deur visuele, simboliese, en/of taalvaardighede op verskillende maniere te gebruik) is hier van toepassing.
• 3 weke behoort voldoende te wees om hierdie module te voltooi.
• ** Aktiwiteit 17 is ‘n taak vir die portefeulje. Hoewel dit ‘n baie eenvoudige opdrag is, moet leerders in staat wees om dit netjies en akkuraat uit te voer. Leerders moet voor die tyd weet hoe opvoeders die taak gaan assesseer.

LEEREENHEID 2 FOKUS OP DESIMALE BREUKE

• Hierdie module is ‘n uitbreiding op werk wat in graad 5 afgehandel is. Leerders moet nou in staat wees om desimale breuke korrek af te rond tot die naaste tiende, honderdste en duisendste. Beklemtoon weer die korrekte metode om op te tel en af te trek (vertikaal). Gee ook baie aandag aan die vermenigvuldiging en deling van desimale breuke.
• Aangesien leerders laasgenoemde nogal moeiliker vind, kan 3 - 4 weke aan dié module spandeer word.
• ** Aktiwiteit 19 is ‘n taak vir die portefeulje. Die opdrag is baie eenvoudig, maar leerders moet in staat wees om dit netjies en akkuraat uit te voer. Leerders moet voor die tyd weet hoe opvoeders die taak gaan assesseer.

Leerders afdeling

Inhoud

Aktiwiteit: om probleme in konteks op te los [lu 1.6.2]

Om data te versamel en vrae te beantwoord [lu 5.2]

Om data te kan opteken [lu 5.4]

Om grafieke te kan teken [lu 5.6]

** Hierdie is ‘n taak vir jou portefeulje. Maak seker dat jy verstaan wat om te doen en hoe jy geassesseer gaan word voordat jy wegspring!

1. Kyk na die afstandsmeter van jou ouers se motor en skryf die lesing neer.

2. Skryf die lesings van nog vier ander motors (familie, vriende, die skoolbus, taxi, ens.) waartoe jy toegang het, neer.

3. Dui jou gegewens netjies op ‘n grafiek van jou keuse aan.

4. Bepaal die afstand wat die vyf voertuie al gesamentlik afgelê het.

5. Bereken nou die verskil tussen die motor wat die verste gery en die een wat die kortste afstand gery het.

6. As Pa se motor 55 liter petrol in sy tenk kan hou en sy motor is dolleeg, wat sal dit hom kos om die motor vol petrol te maak as die petrolprys R3,89 per liter is?

Assessering; afstandsmeters:

1 = benodig aandag

2 = redelik goed 3 = baie goed

4 = uitstekend

Assessering

Leeruitkomste 1: Die leerder is in staat om getalle en die verwantskappe daarvan te herken, te beskryf en voor te stel, en om tydens probleemoplossing bevoeg en met selfvertroue te tel, te skat, te bereken en te kontroleer.

Assesseringstandaard 1.6: probleme oplos in konteks, insluitend kontekste wat gebruik kan word om ‘n bewustheid van ander leerareas, asook van menseregte-, sosiale, ekonomiese en omgewingskwessies, te bevorder, soos:

1.6.2 meting in konteks van Natuurwetenskappe en Tegnologie;

Leeruitkomste 5: Die leerder is in staat om data te versamel, op te som, voor te stel en krities te ontleed om gevolgtrekkings en voorspellings te maak, en om toevallige variasies te interpreteer en te bepaal.

Assesseringstandaard 5.2: eenvoudige dataversamelingsvelle (wat tellings vereis) en eenvoudige vraelyste (met ja/nee-tipe-antwoorde) gebruik om data te versamel (alleen en/of as lid van ‘n groep of span) ten einde vrae wat deur die onderwyser, die klas en die leerder gestel word, te beantwoord;

Assesseringstandaard 5.4: data organiseer en aanteken deur gebruik te maak van tellings en tabelle;

Assesseringstandaard 5.6: ‘n verskeidenheid van grafieke met die hand of tegnologies teken om data voor te stel en te interpreteer (gegroepeer of ongegroepeer).